له لوګر ولايت نه په ترلاسه شوي تازه خبر کې راغلي امريکايي عسکرو د دغه ولايت په څرخ ولسوالۍ کې په يوه پوسته بمبار کړی او له امله يې 17 عسکرو ته مرګ ژوبله اوښتې ده.

د راکړل شوي خبر په اساس بيګا شپه امريکايي عسکرو د لوګر ولايت څرخ ولسوالۍ اړوند سیمه کې د مزدورو عسکرو دغره په نامه پوسته باندې درنه بمباري وکړه .

په دغه هوايي برید کې د مزدورو عسکرو یاده پوسته په ټولیزه توګه ويجاړه شوې او په کې ميشت 10 تنه عسکر ځای په ځای وژل شوي او 7 نور يې مرګوني ټپيان شوي دي .

عيني شاهدان وايي اوس یادې پوستې ته د مزدورو عسکرو یو قطار ورسېد او سیمه يې ټوله محاصره کړې ده.

ديادونې ده چې امریکا يي عسکرو په کراتو د خپلو مزدورانو مراکزو او پوستو په دغه ډول بمبار کړی او ګڼ شمير خپل مزدوران يې وژلي دي.

امکان لري دغه راز بریدونه يا د دې لپاره وي چې امریکايان خپلو مزدورانو ته د زور، کنټرول او واک نمایش کوي او یايې هم د بې احتیاطۍ کچه يې دومره لوړه ده چې حتی خپل مزدوران هم په ورته ړندو بمونو وژني.

2014-03-06